Daraza tirk berê xwe da zarokên kurd ên derveyî welat!

Daraza tirk berê xwe da zarokên kurd ên derveyî welat!

Li aliyekê kesên wek Kemal Burkay û Şivan Perwer vedixwînin Tirkiyeyê, li aliyê din daraza tirk îmze avêt binê bûyerek ku qet nebûyî.

05/04/2011

Li aliyekê kesên wek Kemal Burkay û Şivan Perwer vedixwînin Tirkiyeyê, li aliyê din daraza tirk îmze avêt binê bûyerek ku qet nebûyî. Daraza Tirk der barê 3 zarokên kurd ên ku temenê wan nebûyî 18, li Fransa û Swîsreyê dijîn û qet riya wan bi Tirkiyeyê neketine dest bi lêpirsînê kir. Li Tirkiyeyê bi hezaran zarokên kurd bi hinceta kevir avêtine polîsan niha di girtîgehan de ne û ji bo wana 10 sal cezayê girtîgehê tê xwestin. Polîsên tirk zarokên kurd ên ku beşdarî xwepêşandanan dibin bi hinceta “Kevir avêtine” di çarçoveya “Zagona Tekoşîna bi Terorê re” (TMK) tên girtin. Vê carê daraza tirk ket pey zarokên kurd ên li Franse û Swîsreyê beşdarî xwepêşandanan bûne. Bi hinceta zarokên kurd Şahîn Boztaş, Ridvan Demir û Bozan Mîntaş, di sala 2007’an de li Fransa û Swîsreyê beşdarî xwepêşandana bi boneya şermezarkirina operasyonan bûne û kevir avêtine lêpirsîn hat destpêkirin. Bûyera ku daraza tirk xist nava tevgerê wiha ye: Dadgeha Ceza ya Asliye ya Parîsê di 13’ê Nîsana 2009’an de 3 heta 5 sal cezayê girtîgehê li ciwanên beşdarî çalakiyê bûne birî. Dadgeha Tirk jî di 16’ê Adara sala 2009’an ev dosya ji Fransayê xwestibû. Rayedarên dadgehên fransî dosya ji Tirkiyeyê re şand. Ji ber wê jî Dozgerê Komarê yê Xwedî Rayeya Taybet Selîm Berna Altay yê Dadgeha Stenbolê bi hinceta temenê ciwanan nebûye 18 biryara bêpeywiriyê da û dosyayê ji dozgerê li doza zarokan dinêre re şand. Ger pêwîst bike wê dozgerê li doza zarokan dinêre, li dijî Şahîn Boztaş û Ridvan Demir ên li Franseyê dijî û Bozan Mîntaş ê li Swîsreyê dijî bi hinceta “endamên PKK’ê, madeyên xeter bi kar anîne û ziyanê dane malê rayagiştî” wê doz veke. PARÎS

Gora zarokên xwe dîtin lê belê vê carê jî rastî astengiya dozger hatin

 Gora zarokên xwe dîtin lê belê vê carê jî rastî astengiya dozger hatin

 

  

 

  

 

 Necat Turk, Rida Yavuz û Serhat Bîlen di şahiya pîrozbahiyên 15’ê Tebaxê yên 1992’yê de ji aliyê leşkeran ve hatin gulebarankirin û birîndar bûn piştre hatin binçavkirin

 

 
12/03/2011

 

 

 

 

Necat Turk, Rida Yavuz û Serhat Bîlen di şahiya pîrozbahiyên 15’ê Tebaxê yên 1992’yê de ji aliyê leşkeran ve hatin gulebarankirin û birîndar bûn piştre hatin binçavkirin. Malbatên ku careke din agahî ji zarokên xwe newergirtin, malbatên windayan serî li Dozgeriya Komarê ya Dêrîkê dan û diyar kirin ku zarokên wan bi komî li zeviya kêleka Girtîgeha Dêrîkê hatine veşartin û xwest gor bê vekirin. Lê dozgeriyê bi hinceta ‘delîlên piştrast dikin ku mirî di gorê de hene, tune ne’ daxwaza wan red kir.
Li Dêrikê di pîrozbahiyên salvegera 15’ê Tebaxê yên sala 1992’yan de, şahiyek hate lidarxistin û wê demê leşkeran bi guleyan mudaxeleyî pîrozbahiyên ku li devera Uçyol a Dêrikê kirin û di encamê de Necat Turk, Rida Yavuz û Serhat Bîlen bi awayekî birîndar hatin binçavkirin û malbatan careke din agahî ji wan negirt. Ligel ku şahidan wê demê îfade dan ku ew kes li ber çavên wan hatine binçavkirin jî rayedarên dewletê nexwest bûyerê zelal bikin. Di lêgerîna 18 salan de malbatên fêm kir ku zarokên wan li zeviya kêleka Girtîgeha Navçeyê ya Dêrîkê di goreke komî de hatine binaxkirin. Li ser vê yekê malbatên Turk, Yavuz û Bîlen serî li Dozgeriya Komarê ya Dêrîkê dan û xwestin ku gora komî ya zarokên tê de ne bê vekirin. Dozgeriyê serlêdana malbatan bi hinceteke balkêş red kir.

HINCETA BALKÊŞ
Li ser serîlêdana malbatan dozgeriyê bersiva neyînî da malbatan û bi îdiaya ‘delîlên piştrast dikin ku cenaze di wê gorê de hene, tune ne’ serîlêdana malbatan red kir. Birayê Necat Turk, Celal Turk diyar kir ku wan gelek agahiyên girîng wergirtine ku birayê wî û hevalên wî li nava zeviya navborî hatine veşartin û ji ber vê yekê wan serî li ÎHD’ê daye. Turk wiha got: “Piştî ÎHD’ê me serî li Dozgeriya Komarê jî da. Lê dozger serîlêdana me red kir. Ew bûyer li ber çavê me hemûyan qewimî, lê dîsa jî ew hatin windakirin.”
 
JI RASTIYÊ DITIRSIN
Serokê ÎHD’a Mêrdinê Erdal Kuzu diyar kir ku ligel hemû hewldanên wan rayedarên darazê nexwestine bûyer bê zelalkirin û da zanîn ku ew ji pêvajoya darazê ya Tirkiyeyê encamê negirin, ew ê mijarê bibin Dadgeha Mafên Mirovan a Ewropayê. Kuza bi bîr xist ku wan li devera navborî gorek dîtiye û piştî lêkolînan derketiye holê ku di wê gorê de 3 kesên ku hatine windakirin hene.
Birayê Rida Yavuz, Sedat Yavuz got ku wî jî şahidiya bûyerê kiriye û piştî xwîşka wî Rida û du hevalên wê birîndar bûn li ber çavê gelek kesên ji aliyê leşkeran ve hatin binçavkirin. Leşkeran bi gulebaranê mudaxeleyî çalakiyê kir û bêserober gule dibarandin. Yavuz wiha got: “Wê demê xwîşkeke min di bin çavan de bû. Rida jî bi awayekî birîndar hate girtin û windakirin. Şahidên bûyerê ji tirsa neaxivin.
Piştre leşker ji bo sûcê xwe veşêrin bi dehan caran hatin gund û îdia kirin ku xwîşka min çûye tevli gerîla bûye. Wan digot bêjin, ew çûye çiyan.” Yavuz got ku dayîka wî piştî bûyerê felç bûye û hê jî li benda keça xwe ye.     MÊRDÎN – DÎHA

Zarokên xwe di dilê xwe de vesartin

 Zarokên xwe di dilê xwe de vesartin

 

  

 

  

 

 Gelê kurd cenazeyên gerîlayên HPG’ê bi girseyî her yekî li bajarê wan defin kirin. Li hemberî vê xwedîderketina gelê kurd a li rûmeta xwe polîsên hikûmeta AKP’ê xwe ranegirtin û êrîşî gel kir. Gelê kurd jî bi keviran bersiv da êrîşa polîsan

 

 
07/04/2011

 

 

 

 

Girse bi taybetî  ciwanên ku di meşê de refên pêş de cih girtin bê navber dirûşmên ‘Şehîd namirin’, ‘PKK gel e, gel li vir e’, ‘Bijî Serok Apo’, ‘Tolhildan, tolhildan’ berz kirin û bertekên xwe ya li hemberî operasyonê nîşandan.
Cenazeyên 7 endamên HPG’ê yên di encama operasyona TSK’ê ya li navçeya Hassaya Hatayê de jiyana xwe ji dest dabûn, bi tevlibûna bi sedan kesan ji aliyê malbatên wan ve ji morga Tipa Edlî ya Edeneyê hatin wergirtin. Ji cenazeyên 6 HPG’iyan, yê Aydin Baran (Mazlum Amed) li Amedê li Goristana Yenikoy, Cenazeyê Zekî Durdu (Rojwan Tolhildan) dê li Meletiyê li gundê Atalay ê Yeşîlyurt û cenazeyê Bulent Doner (Devrîm Sîpan) li Wanê, cenazeyê Onder Konca (Boran Nurhak) li navçeya Elbîstana Mereşê li gundê Sevdillî, Cenazeyê Emrullah Atalmiş (Kendal Kavvar) dê li navçeya Tetwana Bedlîsê, li gundê Onsuzê û cenazeyê Şehmus Ozalp (Cîgerxwîn) jî li navçeya  Bismîla Amedê hatin definkirin.

BI GIRSEYÎ PÊŞWAZÎ KIRIN
4 cenazeyên endamên HPG’ê yên di operasyona navçeya Hassaya Hatayê jiyana xwe ji dest dan ji aliyê malbatan ve hatin girtin û şevê din anîn Amedê. Cenazeyên HGP’iyan li ser riya Rihayê ji aliyê sedan wesayîtan ve hatin pêşwazîkirin û bi konvoyê anîn Goristana Yenîkoyê. hevseroka Giştî ya BDP’ê Gultan Kişanak, hevseroka KCD’ê Aysel Tugluk û Parlamenterê BDP’ê Bengî Yildiz jî tevli pêşwezîkirinê bûn. Xwîşka Aydin Baran Gulluşan Baran, dema ku ji bo şuştina cenazeyan çû odeyê bi navê kodê bang li birayê xwe lêkir: “Mazlumê min, fermandarê min tu bi xêr hatî. Ser serê min û çav min hatî Mazlûmê min. Mazlûmê min egîdê mîn ev çend sal in tu gerîla bû. Şehîd namirin” Di wê demê de demên gelek kestiyar hatin jiyîn û ciwanan jî bi slogana ‘Şehîd namirin’ berz kirin. Di dema şuştina cenazayan de di laşê 4 cenazeyên HPG’iyan de şopa gelek guleyan hebû. Di cenazeyê Bulent Doner şopa şewatê di mil û serê wî de hebû.

LI ERXENIYÊ MUDAXALE
Konvoya cenazeyê HPG’iyê bi navê Aydin Baran (Mazlûm Amed) ê li Hassayê di encama operasyonê de bi hevalên xwe re jiyana xwe ji dest dabû gihişt navçeya Erxenê ya Amedê. Bi hezaran kesên di nav de hevseroka Giştî ya BDP’ê Gultan Kişanak û Hevseroka KCD’ê Aysel Tugluk jî di nav de heta derketina navçeyê bi cenaze re çûn. Girseya ku pankarta li ser wênêyên 7 endamên HPG’ê yên li Hassayê jiyana xwe ji dest dabûn û li ser ‘Şehîdên Kurdistanê Nemirin’ dinivîsî vekir û sloganên ‘Şehîd namirin’, ‘Bijî Serok Apo’, ‘Bê Serok jiyan nabe’ berz kir. Vê demê polîsan bi bombeyên gazê mudaxale girseyê kir û ciwanan jî bi kevir û molotofan bersiv da polîsan. Li gel mudaxaleyê jî girseyê dev ji meşê berneda û cenaze bi konvoyê ji bo bê definkirin birê kir gundê Gisgisê. AMED – DÎHA